Вице-премьердің мәлімдеуінше, Қазақстанда жүзеге асырылатын атом электр станциясы жобасына Қытайдың CNNC мемлекеттік корпорациясы техникалық серіктес ретінде тартылған. Бұл туралы ол «Орталық Азия – Қытай» саммиті аясында өткен брифингте айтты.
«Күзге қарай құрылыс алаңы нақты белгіленеді. Бұл ақпарат тіпті одан да ертерек жария етілуі мүмкін», – деді Скляр.
Оның айтуынша, қазіргі уақытта жоба бойынша технико-экономикалық негіздеме (ТЭН) әзірленіп жатыр. Бұл құжат дайын болмайынша, құрылыс мерзімі мен жобаның нақты құны туралы айту ертерек.
«ТЭН әзірленбей тұрып, ешбір құрылыс компаниясы нақты баға ұсына алмайды. Сондықтан алдымен толыққанды негіздеме жасалып, содан кейін барып барлық мәліметтер нақтыланады», – деп түсіндірді Вице-премьер.
Айта кетейік, бұған дейін Қазақстанның Атом энергетикасы агенттігі алғашқы АЭС-тің ресейлік «Росатом» технологиясы негізінде салынатынын хабарлаған болатын. Ал екінші станцияны салу бойынша Қытайдың CNNC корпорациясы қарастырылып жатыр.
