Премьер-Министр қазіргі таңда білім беру объектілерінің бәрі бірдей қауіпсіздік талаптарына сай емес екенін айтып өтті.
«Бұл мәселені ерекше бақылауға алып, балалардың қауіпсіздігі үшін тез арада тиісті шараларды қабылдау қажет», — деді Әлихан Смайылов.
Үкімет басшысы мына мәселелерге назар аударды:
- білім беру нысандарының бәрі оқу жылына 100% дайын болуы тиіс.
- өңір әкімдіктері білім беру ұйымдарының бейнебақылау жүйелерін Ішкі істер органдарының Жедел басқару орталықтарына шығаруды жеделдетуі қажет.
- өңір әкімдіктері көмекке мұқтаж балаларды мемлекеттік қолдау шараларымен 100% қамтамасыз етуі керек.
- мектеп тауарларын төмен бағамен сату үшін мектеп жәрмеңкелерін және шалғай ауылдарға шығатын автодүкендерді ұйымдастыру қажет.
- сауда министрлігі «Атамекен» палатасымен және әкімдіктермен бірлесіп, мектепке қажетті керек-жарақтар бағасының тұрақты болуын қамтамасыз етсін.
- индустрия министрлігі «Атамекен» палатасымен бірлесіп, мектеп формасының құнына қатысты мәселені пысықтасын.
- өңір әкімдіктері мектептерге оқулықтардың қажетті санын жеткізуді қамтамасыз етсін.
- ғылым және жоғары білім министрлігі және өңір әкімдіктері жоғары оқу орындары мен колледждердің басқа қалалардан келген студенттерін жатақханалардағы орындармен қамтамасыз ету жөнінде шаралар қабылдасын.
