«Мәдина Ерланқызының отбасы мен туыстарының қайғысына ортақтасып, көңіл айтамын. Бұл тек олар үшін ғана емес, бүкіл өңір үшін орны толмас қайғы. Біз бәріміз бала тірі және аман-есен табылады деп үміттенген едік. Өкінішке қарай, олай болмады», — деп жазды Қостанай облысының әкімі.
Архимед Мұхамбетов Қостанай ауданының әкіміне жерлеу рәсімін ұйымдастыруға көмектесу, материалдық көмек көрсету бойынша тапсырма берді.
Еске салайық, 7 тамыз күні таңертең Қостанай облысының Жамбыл ауылында бес жасар қыз жоғалып кетті. Бала 18 және 13 жастағы өз әпкелерінің бақылауында болған. Олар таңертең оянғанда баланы таппай қалған.
10 тамыз күні кешке қыздың денесін Жамбыл ауылынан үш шақырым жерде орналасқан жасанды арнадан квадрокоптердің көмегімен тапқан болатын.
Оны іздеуге 500-ден астам полиция қызметкерлері, тікұшақтар, сондай-ақ Ұлттық ұлан мен шекара әскерлерінің әскери қызметшілері қосылды. Жамбыл ауылына жақын көшелерден мыңдаған адам кішкентай қызды іздеген еді.
