9 желтоқсан күні «Астана Арена» стадионында Чемпиондар лигасы аясында өтетін «Қайрат» – «Олимпиакос» футбoл матчына көрермендердің қауіпсіз әрі ыңғайлы жетуін қамтамасыз ету үшін қала әкімдігі қосымша қоғамдық көлік іске қосатынын мәлімдеді.
Әкімдіктің дерегінше, матч күні стадион бағытына 25-ке жуық арнайы автобус қатынайды. Олар мына тұрақтардан жолға шығады:
-
«Қалалық цирк» автотұрағы
-
«Әзірет Сұлтан» мешітінің автотұрағы
-
«Қазақстан» спорт кешенінің автотұрағы
-
Орталық парк автотұрағы
-
«Бас мешіт» автотұрағы
Автобустар 18:00-де жүруді бастайды және стадионға дейін әрі кері бағытта қызмет көрсетеді. Көрермендерге шығу алаңдарына 17:30-ға дейін келу ұсынылады.
Матч күні қауіпсіздік шаралары күшейтіледі.
Астана қаласы Полиция департаменті қоғамдық тәртіпті қамтамасыз ету үшін 2800-ден астам полиция қызметкерін жұмылдырады. Олардың қатарында патрульдік полиция, учаскелік инспекторлар және кинологиялық қызмет мамандары бар.
Сонымен қатар, Қабанбай батыр және Тұран даңғылдарында көлік қозғалысына шектеу енгізілмейтіні хабарланды.
Полиция тұрғындар мен қонақтарға тәртіп сақтау, құқық қорғау қызметкерлерінің нұсқауларын орындау және стадионға қауіпсіз әрі қолайлы жету үшін ұйымдастырылған арнайы автобустарды пайдалануды ұсынады.
