80 келіге дейінгі салмақ дәрежесінде сынға түскен Данил Устинов сол қол сайысында қарсыластарынан басым түсіп, алтын медаль иеленді. Ал оң қол сайысында күміс жүлдеге қол жеткізді. Осылайша қонаевтық спортшы халықаралық доданы екі медальмен аяқтады.
Әлем чемпионаттарында бірнеше рет жүлде алған
Данил Устинов — қазақстандық армрестлингтің тәжірибелі әрі титулды спортшыларының бірі. Ол бұған дейін де әлемдік жарыстарда ел намысын абыроймен қорғап келеді.
2022 жылы спортшы 70 келіге дейінгі салмақ дәрежесінде әлем чемпионатында оң және сол қол сайысынан екі күміс медаль жеңіп алды. 2023 жылы әлем біріншілігінде алтын және қола жүлдеге ие болды.
Ал 2024 жылы 75 келіге дейінгі салмақта оң қол сайысынан әлем чемпионы атанып, сол қол сайысында қола медаль иеленді.
Президент мемлекеттік награда табыстады
VI Дүниежүзілік көшпенділер ойындарындағы табысты өнерінен кейін спортшының жетістігі мемлекеттік деңгейде де жоғары бағаланды.
Қазақстан Президенті Қасым-Жомарт Тоқаев Данил Устиновты «Ерен еңбегі үшін» медалімен марапаттады.
Халықаралық додадан екі жүлдемен оралған жерлес спортшыны Қонаевта да ерекше ықыласпен қарсы алды. Оның кезекті жеңісі Алматы облысының ғана емес, ел спортының жетістігіне айналды.
