Бұл бастама Өзбекстан Президенті Шавкат Мирзиёевтің қолдауымен және Ташкент облысы әкімінің шешімімен жүзеге асқан.
Осыған орай 2 қыркүйекте жаңа оқу жылының басталуымен тұспа-тұс жазушының есімін ұлықтауға арналған салтанатты іс-шара өтеді. Оған Қазақстан мен Өзбекстанның мемлекет және қоғам қайраткерлері, қаламгерлер мен әдебиеттанушылар, зиялы қауым өкілдері, жазушының ұрпақтары, ұстаздар мен оқушылар қатысады деп жоспарланған.
Салтанатты жиында жаңа оқу жылының алғашқы қоңырауы соғылып, жаңартылған мектеп кітапханасы мен Рахметолла Райымқұловтың өмірі мен шығармашылығына арналған мемориалдық бұрыш ашылады.
Сонымен қатар білім ордасының кітапханасына қазақ әдебиетінің таңдаулы шығармалары табысталады. Жазушының әдеби мұрасын жас ұрпаққа кеңінен таныстыру мақсатында рухани-танымдық кеш өткізу де жоспарланып отыр.
Рахметолла Райымқұлов 1913 жылы Қараманас ауылында дүниеге келген. Қаламгер шығармашылық жолында қазақ және өзбек әдебиеті мен мәдениетінің дамуына үлес қосып, екі халық арасындағы рухани байланысты нығайтуға қызмет етті.
Қараманас ауылындағы мектепке жазушы есімінің берілуі – туған жерінде оның әдеби мұрасын ұлықтаудың бір көрінісі. Сонымен қатар бұл бастама Қазақстан мен Өзбекстанға ортақ тарихи-мәдени құндылықтарды дәріптеп, екі ел арасындағы мәдени-гуманитарлық байланысты одан әрі нығайтуға бағытталған.
