Жаңа нысан жас әрі талантты спортшыларды қолдауға бағытталған. Кешен кәсіпкерлердің қолдауымен қысқа мерзімде бой көтерген.
Спорт кешенінің жалпы аумағы шамамен 3 мың шаршы метрді құрайды. Мұнда футбол, волейбол, баскетбол сияқты спорт түрлеріне арналған заманауи алаңдар бар. Нысан толық жабдықталып, балалар мен жасөспірімдердің қауіпсіз әрі сапалы жаттығуына мүмкіндік жасалған.
Алматы облысы әкімінің орынбасары Ғани Майлыбаев кешеннің әлеуметтік маңызын атап өтті.
«Қазірдің өзінде 20 адам жұмыспен қамтылып отыр. Ең бастысы – балалар қалаға бармай-ақ, өз ауылында спортпен айналыса алады. Бұл орын алдағы уақытта жастар көп жиналатын орталықтардың біріне айналады деп сенеміз», – деді ол.
Спорт нысанының құрылысы сегіз айда аяқталған. Инвесторлардың қолдауымен салынған кешенге шамамен 200 миллион теңге көлемінде қаржы жұмсалған.
Кәсіпкер Ернар Айдарұлы бұл бастама жастардың спортқа қызығушылығын арттыруға ықпал ететінін айтты.
«Бұл жерде футзал, баскетбол, күрес, бокс сияқты түрлі спорт түрлерімен айналысуға мүмкіндік бар. Балалар осы жерде шыңдалып, үлкен жетістіктерге жетеді деп сенеміз», – деді ол.
Айта кетейік, Іле ауданы – халық тығыз орналасқан өңірлердің бірі. Мұнда аудандық және облыстық деңгейдегі жарыстар жиі ұйымдастырылады.
Жергілікті тұрғындардың айтуынша, мұндай нысандар балалардың бос уақытын тиімді өткізуіне және денсаулығын нығайтуға үлкен мүмкіндік береді.
