McDonald’s мейрамханалар желісі бұған дейін ресейлік ет өнімдері және жартылай фабрикаттармен қамтамасыз етілді, онда компанияның ірі тарату орталықтары болды. Бірақ McDonald’s-тың Ресейден кетуіне байланысты шикізатты жеткізуде проблемалар туындаған.
Шетелдік компанияның өкілдері келешекте қазақстандық өнімге көшуге дайын болған. Алайда, отандық өндірушілер үшін компанияның жоғары стандарттарын енгізу белгілі бір уақытты алған. McDonald’s өкілдерінің өтініші бойынша, жергілікті шикізатқа көшкенге дейін ауыл шаруашылығы министрлігі және басқа да мемлекеттік органдар ел аумағындағы мейрамханалар желісінің жабылуына жол бермеу үшін үшінші елдерден өнім жеткізу рәсімдерін жеделдетуге және жеңілдетуге жәрдемдесуге дайын болды, қазір де дайын.
Осы уақытта қазақстандық ет және сүт өнімдерін өндірушілер өндірісті McDonald’s талаптарына сәйкес келтіру бойынша жұмысты бастаған және 2023 жылдың басында кәсіпорындардың аудиті бойынша жұмыстар жоспарланған болатын. Алайда, McDonald’s-тың жабылуына байланысты жоспарланған аудит болған жоқ.
Бұл компанияға шикізат немесе жартылай фабрикаттар жеткізу үшін сертификаттаудан өту керек. Бұл жұмыс мал азығынан бастап қаптамаға дейін қатаң талапты қажет етеді. Министрліктің айтуынша, компанияның белгілі бір жеткізушіні таңдайтынына сенім жоқ.
Министрліктің айтуынша, McDonald’s Қазақстаннан шикізаттың тапшылығына бола кеткен жоқ.
Ал Қазақстан еттің барлық түрі бойынша ішкі нарықты толық көлемде қамтамасыз етіп отыр. Өткен жылы Қазақстанда барлық түрі бойынша 0,4% артық, яғни 1,06 млн тонна ет өндірілді.
Бүгінгі таңда ауыл шаруашылығы саласында шетелдік инвесторлардың қатысуымен жалпы құны 3,6 млрд доллар болатын 38 жоба іске асырылып, кейбірі пысықталып жатыр.