Құжатта алдағы үш жылға арналған ел қазынасының кірістері мен шығыстарының негізгі бағыттары айқындалған.
Болжам бойынша, 2026 жылы түсімдер көлемі – 19,2 трлн теңге, 2027 жылы – 21,2 трлн теңге, ал 2028 жылы – 23,2 трлн теңге көлемінде жоспарланып отыр.
Шығыстар сәйкесінше 27,7 трлн, 28,7 трлн және 29,7 трлн теңге көлемінде болмақ. Сонымен қатар, Ұлттық қордан кепілдендірілген трансферт көлемі жыл сайын шамамен 2,8 трлн теңгені құрайды.
Үкімет 2026 жылы өңірлерге бөлінетін шығындарды 700 млрд теңгеге қысқартуды көздеп отыр. Нәтижесінде бұл бағыттағы қаржы көлемі 5,1 трлн теңге деңгейінде белгіленді. Ал өзге де шығындар 1,7 трлн теңге шамасында шектелмек.
Айта кетерлігі, 2026 жылы жаңа жобаларды қаржыландыру жоспарланбаған — барлық қаражат бұрыннан жүзеге асырылып келе жатқан бастамаларды аяқтауға бағытталады.
Мәжіліс қараған үш жылдық бюджет елдің макроэкономикалық тұрақтылығын қамтамасыз етуге және әлеуметтік міндеттемелерді орындауға бағытталған стратегиялық құжат болып саналады.
