Аталған мәселе Жоғары аудиторлық палатаның тапсырмасымен қолға алынып, Ұлттық экономика және Қаржы министрліктері қажетті шараларды қабылдаған. Нәтижесінде, 2024 жылғы 15 наурызда мемлекет басшысы қол қойған жаңа Бюджет кодексінде тиісті норма заң жүзінде бекітілді.
«Бұл қадам бюджет қаражатын пайдалану тиімділігін арттырады. Енді бөлінген ақша квазимемлекеттік компаниялардың шотында бос жатпай, қайтадан бюджетке қайтарылады. Бұл қаржы ел үшін аса маңызды және шұғыл міндеттерге, соның ішінде ұзақ мерзімді инвестициялық жобаларды іске асыруға бағытталуы мүмкін», – делінген Жоғары аудиторлық палатаның мәліметінде.
Палата жаңа тәртіп бюджет қаражатын мақсатсыз немесе тиімсіз пайдалану тәуекелін азайтып, ашықтық пен есептілікті күшейтеді деп есептейді. Сонымен қатар, енді ұлттық компаниялар бөлінген қаражатты игеруге және жоспарлауға барынша жауапкершілікпен қарайтын болады, себебі пайдаланылмаған қаржы жыл соңында міндетті түрде мемлекетке қайтарылуы тиіс.
