Жоспар бойынша, 3 маусым күні Никос Христодулидис Қазақстан президенті Қасым-Жомарт Тоқаевпен кездеседі. Сондай-ақ делегациялар арасында кеңейтілген келіссөздер өтеді. Қазақстан президенті Христодулидиске мемлекеттік награда — «Достық» орденін табыстайды деп күтілуде.
Тараптар жоғары білім және ғылыми зерттеулер, мәдениет, спорт, ақпараттық-коммуникациялық технологиялар, киберқауіпсіздік және электронды үкімет салаларына қатысты бірнеше меморандумға қол қояды.
Сонымен қатар, Христодулидис Кипр–Қазақстан бизнес-форумында сөз сөйлеп, Alem AI халықаралық жасанды интеллект орталығына барады және Астанада Кипр елшілігін ашады.
Никос Христодулидистің Қазақстанға алғашқы ресми сапары 4 маусымда аяқталып, сол күні Кипр президенті еліне оралады.
Сарапшылардың пікірінше, бұл сапар Қазақстан мен Кипр арасындағы саяси, экономикалық және инвестициялық ынтымақтастықты жаңа деңгейге көтеруге мүмкіндік береді.
