Тұрғындардың айтуынша, жолдың арғы бетіндегі жұмыстарын бітіру үшін тас лақтырым жерге қаланы айналып 25 шақырым жол жүруі керек. Айналма жолда елді мекендерге кіріп-шығуға арналған жолайрықтар салу қарастырылмаған. Әлеуметтік нысандарға қатынассыз қалған жұрт жол салып беруді сұрап, серіктестікке де барған. Олар уәдені үйіп-төккенімен, жалғыз кісілік көпір салуға кірісіпті. Серіктестіктің бұл ісі тұрғындардың шамына одан әрі тиген.
«Жұмыс жобаға сәйкес жүріп жатыр. Онда көліктер кіріп-шығатын жолақтар жоқ. Яғни, тек тораптар ғана болады. Қазір Алматы облысы әкімдігінің тапсырмасымен жолайрықтар салынып жатыр. Бұл тұрғындардың жолды емін-еркін кесіп өтуіне септігін тигізеді», — дейді басы дауға қалған компания өкілдері.
Компания өкілінің мәліметіне сүйенсек, айналма жол жоспарланған кезде іргелес ауылдардың бас жоспары болмаған. Тек биыл наурыз айында ғана әзірленіпті. Сондықтан әкімдік мәселені жедел шешуге тырысып жатқан көрінеді.
