Бүгін Мәжілісте өткен баспасөз мәслихатында тілшілер Бас прокурордың орынбасарынан бұрынғы Төтенше жағдайлар министрі Юрий Ильиннен, Экология министрі Зүлфия Сүлейменовадан, Абай облысының әкімі Нұрлан Ұранхаевтан, Шығыс Қазақстан облысының әкімі Даниал Ахметовтен орман өртіне қатысты жауап алу мүмкіндігі туралы сұрақ қойды.
«Қазір бұл қылмыстық іс бойынша ешкімнің де іс-әрекеті әлі сараланбады. Тергеу жақында ғана басталды. Сондықтан лауазым иелері мен басқа да қызметкерлерге қатысты қылмыстық іс бойынша статусы, іс-әрекеті сараланған жоқ», — деді Жандос Өмірәлиев
Оның айтуынша, қылмыстық іс бойынша тергеу екі айға созылады.
«Дәл қазір тергеу амалдарына тартылуы тиіс адамдар өрт сөндіруге жұмылдырылған. Біздің басты мақсатымыз – өртті сөндіру. Сондықтан қазір біз олардың негізгі жұмысына араласпаймыз. Кейіннен олардан міндетті түрде жауап алынады. Қазіргі кезде басқа да тергеу амалдары ескерілген», — деді Бас прокуратура өкілі.
Бұл тұрғыда ол тиісті тергеу жоспары бар екенін, тергеушілер осы жұмыспен айналысып жатқанын айтты.
«Лауазым иелерінен жауап алудан бұрын, біз басқа да бірқатар мән-жайды анықтап, нақтылауымыз қажет. Сонымен қатар, қатардағы қызметкерлерден жауап алуымыз керек. Жалпы, іске қатысты адамдардың барлығы тергеледі», — деді ол.
