Екібастұз әкімдігінің хабарлауынша, 2022 жылғы 8 желтоқсанда Екібастұз қаласының әкімі жергілікті ауқымдағы техногендік сипаттағы төтенше жағдай режимінің күшін жою туралы шешім қабылдады.
«Барлық көппәтерлі тұрғын үйлер жылумен қамтамасыз етілген. Сонымен қатар, көппәтерлі және жеке жер үйлерде гидравликалық режимді қалпына келтіру бойынша реттеу жұмыстары жалғасатын болады. Сәтбаев, 8 және Мәшһүр Жүсіп 52 көшелеріндегі үйлердің 7 корпусында су мен кәрізді қалпына келтіру жұмыстары жүргізіліп жатыр, — делінген хабарламада.
Әкімдік мәліметінше, жеке сектордың жылумен жабдықтау жүйелерін қалпына келтіру жұмыстары әлі жалғасып жатыр. Орталық жылумен жабдықтауға қосылмаған тағы 40 жер үй бар.
«Сегіз бригаданың күшімен қаланың жылу трассаларындағы ұсақ ақаулар мен зақымдарды жою жұмыстары атқарылып жатыр. Магистральдық және орамішілік желілердегі температуралық параметрлерді теңестіру және реттеу жұмыстары жүргізіліп жатыр. Тұрғындар жылумен жабдықтау мәселелерімен «Екібастұзтеплоэнерго» ЖШС апаттық қызметіне тәулік бойы жүгіне алады», — деп хабарлады әкімдік.
Үй-жайларда қажетті температуралық режим белгіленгеннен кейін мектептер мен балабақшалардың жұмысын штаттық режимде қайта бастау жоспарланды.
