Шешім Бас прокуратурамен бірлесіп азаматтардың деректерін қорғау және қауіпсіздікті күшейту мақсатында қабылданған.
Министрліктің мәліметінше, бұрын бірқатар мемлекеттік сервистерге бір реттік SMS-код арқылы кіруге рұқсат берілген. Алайда 1414-тен келетін хабарламалар арқылы жеке деректерді ұрлау тәуекелі жоғары екені анықталған. Сондықтан ақпараттық жүйе иелеріне қолжетімділік талаптарын қатаңдатып, SMS-кодтарды мүлде қолданбау жөнінде тапсырма берілді.
Енді 1414 SMS-шлюзін пайдаланып келген барлық жүйелерге кіру тек қауіпсіз тәсілдер арқылы жүргізіледі. Ол үшін үш механизм қолданылады:
биометриялық аутентификация;
электрондық цифрлық қолтаңба (ЭЦҚ);
eGov QR-коды.
2024 жылғы желтоқсаннан бастап көрсетілген міндетті талаптарды орындамаған ақпараттық жүйелер 1414 SMS-шлюзінен ажыратылды.
Министрлік бұған дейін де 1414-тен келетін кодтардың несие рәсімдеуге қатысы жоқ екенін ескерткен болатын. Бұл — алаяқтардың психологиялық айласы. Олар SMS-код арқылы азаматтың сеніміне кіріп, жеке деректерін тартып алады. Нәтижесінде ұрланған ақпарат микрокредит рәсімдеуге пайдаланылуы мүмкін.
Ведомство азаматтарды сақ болуға және күдікті хабарламаларға жауап бермеуге шақырады.
