Металлург күні Қазақстан Республикасы Президентінің 2003 жылғы Жарлығымен белгіленген және жыл сайын шілденің үшінші жексенбісінде атап өтіледі. Бұл – ел экономикасының тірегі саналатын өнеркәсіп саласы үшін аса маңызды мерекелердің бірі.
Металлургия – экономиканың іргелі саласы. Қара металлургия – ауыр өнеркәсіптің негізі. Шойын мен болат өндірісінсіз құрылыс, машина жасау, кеме және ұшақ құрастыру секілді стратегиялық маңызы зор салаларды дамыту мүмкін емес. Сондықтан ғылыми-техникалық прогрестің негізін қалаушы салалардың бірі ретінде металлургияға ерекше мән беріледі.
Сондай-ақ, Қазақстанның түсті металлургиясы – елдің ең көне әрі жетекші өнеркәсіп салаларының бірі. Бұл бағыттың дамуы еліміздің пайдалы қазбаларға бай жер қойнауымен тікелей байланысты. Түсті металдар кен орындарының көп болуы өндірістік кешеннің нығаюына ықпал етіп келеді.
Түсті металлургияда Қазақстан мыс, мырыш, қалайы, қорғасын, мишьяк, сүрме және сынап сынды металдарды өндіруде елеулі орын алады. Сонымен қатар, алтын, күміс және сирек кездесетін бағалы металдарды – осмий, палладий, иридий, родий және басқа да элементтерді өндіру мен қайта өңдеу еліміздің алтын-валюта қорын толықтырудың маңызды көзі саналады.
Қазақстан металлургиясын дамыту – ұлттық экономиканың бәсекеге қабілеттілігін арттыру жолындағы маңызды қадам. Бұл салада еңбек етіп жүрген барлық металлургтерді кәсіби мерекелерімен шын жүректен құттықтаймыз!
