Тергеу мәліметінше, күдікті соңғы бес жыл бойы Instagram желісінде qais_arr атауымен белсенді блогерлік қызмет жүргізіп, 2,4 миллионнан астам жазылушы жинаған. Сонымен қатар, Telegram мессенджеріндегі «Қора энтертейнмэнт» атты жабық арнаны басқарған, оның аудиториясы 368 мыңнан асады.
Күдікті әлеуметтік желідегі жеке аккаунттарын пайдалана отырып, Қазақстан азаматтарын «Pinco» сайтында тіркелуге және құмар ойындарға қатысуға бағыттайтын тікелей сілтемелерді, графикалық элементтер мен үндеулерді қамтыған бейнематериалдар мен жарияланымдарды жүйелі түрде орналастырып отырған. Сондай-ақ бейнероликтердің астында пайдаланушыларға бонус беретін жеке промокодын көрсеткен.
Тергеу дерегіне сәйкес, Қамза Қ.Б. азаматтарды құмар ойындарға тартуға бағытталған онлайн-платформаны жарнамалап, ойын платформасынан сыйақылар, бонустар немесе пайыздық аударымдар түрінде табыс алған. Заңсыз жолмен алынған кірістерді жасыру мақсатында күдікті криптоәмиян пайдаланған. Оған «Pinco» интернет-казиносының ұйымдастырушыларынан төлемдер түсіп отырғаны анықталған.
Сот санкциясымен 182 736,741 USDT көлеміндегі криптоактивтерге тыйым салынды.
Егер іздеуде жүрген тұлғаның орналасқан жері туралы қандай да бір ақпарат белгілі болса, Қаржылық мониторинг агенттігі келесі байланыс нөміріне хабарласуды сұрайды:
+7 7172 70 84 78 – кезекші бөлім.
