Бас прокурордың орынбасары Әсет Шындалиев «Қаңтар оқиғасына» қатысты жауапқа тартылғандарға қашан амнистия жарияланатынын айтты.
«Президенттің Жолдауында аталған тапсырманы орындау үшін бірнеше факторға жүгінуіміз қажет. Рақымшылық жасауға байланысты алдымен қоғамдық талқылаудан өткізуіміз керек, кейіннен басқа мемлекеттік органдармен келісімге келуіміз тиіс. Одан кейін бұл ұсынысты Үкіметтің қарауына жолдаймыз. Бұл — көп уақыт талап ететін іс-шара. Мен сіздерге жыл соңына дейін бір шешімге келеміз деп айта алмаймын. Мұның бәрі Парламенттің жұмыс істеу кестесіне қарай белгілі болады», — деді прокурор орынбасары.
Қазіргі таңда 100-ге жуық адам қамауда отыр. Ал рақымшылыққа қанша адам ілінетіні белгісіз.
«Мен сіздерге бірден мынанша адамға кешірім берілетінін де айта алмаймын. Жоғарыда айтылғандай, 900-ден астам адамның көбі бас бостандығынан толық айырылған жоқ, яғни тек бостандығы шектетілді. Олар жазасын шартты мерзімде өтейді я айыппұл төлейді. Тек 10% адам ауыр қылмысқа барды немесе бұрын істі болған адамдар», – деді өз сөзінде Әсет Шындалиев.
Естеріңізге сала кетсек, ҚР Президенті «Қаңтар оқиғасы» бойынша жазаға тартылғандарға бір реттік рақымшылық көрсету керектігін айтты.
