Бұл күні балалар арасында жамбы ату, асық, бестас сынды ұлттық ойындар ойнатылып, бокс, каратэ түрлерінен шоу көрсетілді. Алматы облыстық дене шынықтыру және спорт басқармасының басшысы Нұрбақыт Теңізбаев бастаған спорт сайыпқырандары озық шыққан балалар мен командаларға жүлде табыс етті.
«Алатау әуендері» фольклорлық-этнографиялық ансамблінің өнерпаздары өнер көрсетті. «Гүлдер» балабақшасының тәрбиеленушілерінің қолынан шыққан бұйымдар көрмеге қойылып, қонақтардың назарына ұсынылды.
— Мұндағы заттардың бәрін балдырғандарымыз өз қолымен жасады. Әрине, ата-ана мен біздің үлесіміз бар шығар, десе де, ынталы балалар өздерінің ойындағы заттарын нақыштап, зерлеп бүгінгі мерекеге тарту етіп отыр. 275 бала тәрбиеленіп жатқан біздің балабақшамыз «Гүлдер» деп аталғандықтан, мұндағы бұйымдардың барлығы гүлмен көмкеріліп жасалынған, — дейді балабақша тәрбиешісі Гүлнар Нұрдәулет.
Алаңда садақ асынған жеткіншектер көпшілік назарын аударды. Садаққа тағар сайгез оғын сайлап, жамбыны нысанаға алған жас мергендердің тәлімгері Алдияр Нұрғазиев: «Бұл сақ жауынгерлерінің дәстүрлі киімі. Біз оқушыларды тек оқ атуға ғана үйретіп қоймай, атқа отыруға, жылқы баптауға баулимыз», — дейді.
Сондай-ақ, қала тұрғындары мен қонақтар «Айбыны асқақ, тұғыры биік– Елорда» атты кітап көрмесін тамашалап, Нұр-Сұлтан қаласы жайлы туындылармен танысты.
Мерекелік шара кешке қарай өнер жұлдыздарының гала-концертімен жалғасты.
