Оқиға Ақмола облысының Целиноград ауданына қарасты Төңкеріс ауылының маңында болды.
Ақмола облысының Полиция департаменті аталған деректі растады. Қазіргі уақытта ұшақтың құлауына байланысты тергеу амалдары басталған.
Облыстық Төтенше жағдайлар департаментінің хабарлауынша, Aerostar R40F UP-LA229 маркалы жеңіл моторлы әуе кемесі жалпы авиация желісі бойынша жоспарлы ұшу кезінде жерге қатты қонған. Әуе оқиғаларын тергеу қағидаларына сәйкес арнайы комиссия құрылды. Қазақстан Республикасы Көлік министрлігінің Оқиғалар мен инциденттерді тергеп-тексеру департаментінің мамандары апат орнына шыққан.
Көліктегі полиция департаменті таратқан мәліметке сәйкес, апат салдарынан екі адам – ұшқыш пен жолаушы көз жұмды. Қылмыстық кодекстің 344-бабының 3-бөлігіне сәйкес сотқа дейінгі тергеу басталды.
Қазіргі уақытта апаттың нақты себептері анықталуда. Өзге мәліметтер қылмыстық-процестік заңнамаға сәйкес жарияланбайды.
