Күдіктілерді құрықтау үшін алғаш рет әйелдерден құралған арнайы жасақ тартылған. Ұсталғандар есірткі заты-гашиш майын дайындауға және одан әрі өткізуге әрекеттенген. Айта кетейік, Атбасар қаласындағы есірткі қылмысына қарсы іс-қимыл басқармасының қызметкерлері «Қарасора-2022» жедел алдын алу іс-шарасы аясында есірткімен байланысты біраз заң бұзушылықты анықтады.
«Полицейлер анықтағандай, 38 жастағы ер адам мен оның азаматтық некедегі 37 жастағы жұбайы екеуі үй жағдайында каннабистен қарасора сығындысын жасап, одан алынған есірткіні сатқан. Сондай-ақ, ер адам бұрын есірткі заттарының заңсыз айналымы бойынша сотты болғаны және өзінің де есірткіні тұтынатыны белгілі болды», — деді ведомство өкілдері.
Полиция есірткі сатуға әрекет жасаған күдіктіден 4 грамнан астам гашиш майын алды. Олардың тұрғылықты жерінен де ұқсас зат табылып, тәркіленді. Ұсталу кезінде күдікті әйел полицейлерге қарсылық көрсетіп, тәртіп сақшыларының заңды талаптарына бағынбаған. Полиция қызметкерлерінің жедел әрекеттерінің арқасында қала тұрғыны қамауға алынды.
Қазіргі уақытта аталған факті бойынша ҚР ҚК 297 — бабының 3-бөлігі (есірткі құралдарын заңсыз өткізу) бойынша сотқа дейінгі тергеу басталды.
