Қалалық прокуратура хабарлағандай, 2023 жылдың тамызында жедел-іздестіру іс-шаралары барысында ұйымдасқан қылмыстық топтың мүшесі К.С. ұсталды.
Ол ҚР ҚК-нің 262-бабы 2-бөлігінде және 216-бабы 3-бөлігінде (жалған шот-фактураларды жазып беру бойынша ұйымдасқан қылмыстық топты құру) көзделген қылмыстарды жасады деген күдікпен халықаралық іздеуде болған.
«Күдікті жосықсыз кәсіпкерлерге жасалмаған қызметтер мен жұмыстар үшін жалған шот-фактуралар жазып берген. Қылмыстық әрекеттен мемлекетке келтірілген залал көлемі 870 миллион теңгені құрады», — делінген ведомство хабарламасында.
Тергеу сотының санкциясымен ол күзетпен қамауға алынды. Қазіргі кезде қажетті тергеу әрекеттері жүргізіліп жатыр.
Күдіктіні ұстау жұмысын Алматы қаласы прокуратурасының үйлестіруімен Экономикалық тергеу департаментінің қызметкерлері жүргізді.
«Қылмыс істегені үшін құқық қорғау органдарынан жасырынып жүрген адамдарды іздестіру жұмыстарын жандандыру жалғасып жатыр», — дейді прокуратура өкілдері.
