Жол қызметі мамандары жоспарлы тексеру кезінде аталған жолдың 20-шы шақырымында еріген қар суының ағысы күшейгенін анықтаған. Қосымша тексеру барысында су өткізу құбырының бүлініп, жиналған судың жол жамылғысын шайып кеткені белгілі болды.
Мамандардың айтуынша, бұл жол учаскесі 1960–1970 жылдары салынған. 50 жылдан астам уақыт ішінде мұнда мұндай жағдай тіркелмеген, сондықтан аймақ бұрын тасқын қаупі бар аумақ ретінде қарастырылмаған.
Қауіпсіздік мақсатында жол қозғалысы дереу тоқтатылып, тиісті шаралар қабылданды. Қазіргі уақытта апат орнында арнайы техника жұмыс істеп жатыр. Көлік қатынасын үзбеу үшін уақытша жол салынған.
Жол қызметінің мәліметінше, су өткізу құбыры мен бүлінген жол жабындысы еріген су деңгейі төмендегеннен кейін қалпына келтіріледі. Сонымен қатар аталған учаскеде орташа жөндеу жұмыстарын жүргізу мердігер ұйымға тапсырылған.
Жөндеу барысында зақымданған бөліктер толық қалпына келтіріліп, жол инфрақұрылымының табиғи апаттарға төзімділігі күшейтіледі.
Қазіргі таңда жағдай тұрақты бақылауда.
