Құтыру көбіне жануар тістегенде немесе оның сілекейі арқылы жұғады. Жыл сайын облыста 4 мыңнан астам адам құтыруға қарсы медициналық көмекке жүгінеді.
Статистикаға сәйкес, зардап шеккендердің 85 пайызы – иттен, 10 пайызы – мысықтан, 3 пайызы – кеміргіштерден, ал 1 пайызы басқа жануарлардан зардап шеккен. Сонымен қатар жағдайлардың жартысы балалар мен жасөспірімдер арасында тіркеледі.
Мамандардың айтуынша, жағдайлардың 40 пайызында адамдар қауіпті аймақтардан жарақат алады. Мұндай кезде антирабиялық вакцинамен қатар қосымша иммуноглобулин енгізу қажет.
Ең көп жағдайлар Қарасай, Іле, Талғар және Еңбекшіқазақ аудандарында тіркелген.
2025 жылы облыстық бюджет есебінен 95 миллион теңгеден астам қаражат бөлініп, 28 480 қаңғыбас жануар ауланған. Сонымен қатар 158 жануар иесі әкімшілік жауапкершілікке тартылған.
Алматы облысының бас мемлекеттік санитариялық дәрігері Марат Исмаилов тұрғындарды сақтық шараларын сақтауға шақырды.
Мамандардың негізгі ұсынымдары:
- жабайы және қаңғыбас жануарларға жақындамау;
- үй жануарларын жыл сайын вакцинациялау;
- тістелген жағдайда жараны 10–15 минут сабынды сумен жуып, антисептикпен өңдеу және дереу дәрігерге қаралу;
- вакцинацияны мүмкіндігінше ерте бастау.
Сондай-ақ дәрігерлер «40 укол» туралы түсініктің ескіргенін атап өтті. Қазіргі таңда емдеу курсы 5–6 екпеден тұрады.
Мамандар вакцинация кезінде және одан кейінгі алты ай бойы алкоголь қолдануға болмайтынын ескертеді. Бұл иммундық жүйенің әлсіреуіне және жанама әсерлердің күшеюіне әкелуі мүмкін.
Айта кетейік, соңғы 10 жылда облыста туляремия ауруы тіркелмегенімен, Балқаш, Еңбекшіқазақ, Жамбыл, Іле, Талғар және Ұйғыр аудандарындағы 24 елді мекен аумағында оның табиғи ошақтары бар. Сондықтан эпидемиологиялық қауіп сақталып отыр.
