Алматы облысында энергетикалық инфрақұрылымды дамыту, электрмен жабдықтау жүйесінің сенімділігін арттыру және тұрғындарды табиғи газбен қамту бағытында бірқатар ірі жоба жүзеге асырылмақ.
Энергетика вице-министрі Бақытжан Ілияс өңір тұрғындарымен кездесіп, облыстың отын-энергетика кешенінің қазіргі жай-күйі мен алдағы даму жоспарларын таныстырды. Кездесуде электр энергетикасы, газдандыру және жаңартылатын энергия көздерін дамыту мәселелері талқыланды.
Қазіргі уақытта Алматы облысының электр энергетикасы кешенінде жалпы белгіленген қуаты 664 МВт болатын Қапшағай және Мойнақ су электр станциялары маңызды рөл атқарады. Сонымен қатар өңірдегі жылумен жабдықтау жүйесінің жұмысын облыстық қазандықтар қамтамасыз етеді. Энергетика министрлігінің жоспарына сәйкес, 2026 жылы Алатау қаласында электрмен және жылумен жабдықтау инфрақұрылымын жаңғыртуға бағытталған бес жобаны іске асыру көзделген.
Аталған жобалар қолданыстағы инженерлік желілердің жұмысын жақсартуға, энергетикалық инфрақұрылымның сенімділігін арттыруға және тұтынушыларды тұрақты энергиямен қамтамасыз етуге бағытталған. Бұдан бөлек, облыста екі жаңа қосалқы станция салу жоспарланып отыр. Атап айтқанда, Индустриялық аймақта «Арна», ал Қонаев қаласында «Көкшіл» қосалқы станциялары бой көтермек. Жаңа энергетикалық нысандардың құрылысы электр желілеріне түсетін жүктемені тиімді бөлуге және өңірдің өсіп келе жатқан энергетикалық қажеттілігін қамтамасыз етуге мүмкіндік береді.
Кездесу барысында тұрғындарды табиғи газбен қамтамасыз ету мәселесіне ерекше назар аударылды. Ұсынылған мәліметке сәйкес, бүгінде Алматы облысында шамамен 1,2 миллион адам табиғи газды пайдаланады. Өңірдегі газдандыру деңгейі 77,8 пайызды құрайды. Алдағы жылдары газ инфрақұрылымын кеңейту мақсатында бірнеше маңызды жобаны жүзеге асыру жоспарланған.
Атап айтқанда, 2027–2028 жылдары «Шелек – Кеген – Нарынқол» магистральдық газ құбырын салу көзделіп отыр. Бұл жоба облыстың шалғай елді мекендерін табиғи газбен қамтамасыз ету мүмкіндігін кеңейтуге бағытталған.
Сонымен қатар Қонаев қаласында «Жаңа Іле» автоматтандырылған газ тарату станциясын салу жоспарланған. Аталған жобалардың жүзеге асырылуы өңірдің газбен жабдықтау инфрақұрылымын дамытуға және тұрғындардың табиғи газға қолжетімділігін арттыруға ықпал етпек.
Алматы облысы жаңартылатын энергия көздерін дамыту әлеуеті жоғары өңірлердің бірі саналады.
Қазіргі уақытта облыста жалпы белгіленген қуаты 376,3 МВт болатын 27 жаңартылатын энергия нысаны жұмыс істейді. Осы көрсеткіш бойынша Алматы облысы республикада төртінші орында тұр.
Энергетика министрлігінің мәліметінше, 2031 жылдың соңына дейін өңірде жалпы қуаты 246,24 МВт болатын тағы 18 жаңартылатын энергия нысанын салу жоспарланған. Егер жоспарланған жобалар толық жүзеге асырылса, облыстағы жаңартылатын энергия нысандарының саны 45-ке, ал олардың жиынтық белгіленген қуаты 622,54 МВт-қа жетеді. Жаңа жобалар өңірдің энергетикалық әлеуетін арттырумен қатар, электр энергиясын өндіру көздерін әртараптандыруға және экологиялық тұрғыдан орнықты энергетика жүйесін дамытуға мүмкіндік береді.
Энергетика вице-министрінің Алматы облысының тұрғындарымен кездесуінде коммуналдық және энергетикалық инфрақұрылымға қатысты өзекті мәселелер де талқыланды.
Атап айтқанда, тұрғындар электрмен жабдықтау желілеріне қосылу, қолданыстағы инфрақұрылымды жаңғырту және елді мекендерді одан әрі газдандыру мәселелерін көтерді.
Бақытжан Ілияс тұрғындардың сауалдарына жауап беріп, айтылған өтініштер мен ұсыныстар назардан тыс қалмайтынын жеткізді. Вице-министрдің айтуынша, кездесуде көтерілген мәселелер Энергетика министрлігінің бақылауында болады.
