«Өткен жылы облыста 54 мектеп үш ауысымда жұмыс істеді. Осы мәселені шешу үшін 2022 жылы 20 нысана салу жоспарланды. Биыл 12 мектеп қолданысқа беріледі. Оның ішінде, 1-қыркүйекте Жамбыл ауданында 1 мектеп ашылады. Қалғаны жыл соңына дейін жұмысқа кіріседі. Биыл үш ауысымда қанша мектеп жұмыс істейтіні белгісіз, балалар оқуға кірген соң нақты санды айта аламыз. Сонымен қатар, облыста оқу жылының басында 3 жеке меншік мектеп өз жұмысын бастайды», — дейді облыстық орта білімді дамыту бөлімінің басшысы Әлішер Ғалымұлы.
Сондай-ақ, былтыр әлеуметтік осал топтағы, көпбалалы отбасыдан шыққан, белгілі бір жеңілдігі бар 43339 балаға тегін тамақ берілді.
«ҚР Үкіметінің № 544 қаулысы күшіне енгеннен кейін мектеп формасы мен кеңсе тауарларын сатып алуға бір балаға 37 500 теңге жұмсалатын болды. Бұл мақсатқа бюджеттен қосымша 343,1 млн. теңге бөлінеді. Ата-аналардың жеке шотына ақша аудару 25 тамызға дейін аяқталады», — дейді Ә. Ғалымұлы өз сөзінде.
Айта кетейік, Алматы облысында 423 мектепте 317 446 бала оқиды. Оның ішінде 694 млн.теңге сомасына аз қамтылған отбасылардан шыққан 27 765 баланы тегін мектеп формасымен және кеңсе керек-жарақтарымен қамтамасыз ету жоспарланған.
