«ҚР Президентінің тапсырмасын орындау аясында облыстық прокуратура өкілдері 114 мың га жайылымдық жерді мемлекет меншігіне қайтарды. Бұл жерлердің жалпы құны — 1,4 млрд теңгені құрайды», — дейді облыстық прокуратураның баспасөз хатшысы Мақсат Ержанұлы.
Оның айтуынша, прокуратура өкілдері аталған жер учаскелері көп жылдар бойы тікелей мақсаты бойынша пайдаланылмағанын анықтаған. Өз кезегінде, басқа фермерлер егістік және жайылымдық жерлерге мұқтаж болған.
«Мысалы, Іле ауданында жоғары лауазымды шенеуніктердің туыстарына заңсыз берілген жалпы ауданы 1743 га болатын 10 учаске қайтарылды», — дейді баспасөз хатшысы.
Прокуратура ұсынған мәліметке сүйенсек, қазіргі таңда қайтарылған жер учаскелерін жалпыға ортақ жайылымдық жерге ауыстыру бойынша құжаттар рәсімделіп жатыр. Бұл процесс кезең кезеңімен жүзеге асатын болады.
Сонымен қатар Мақсат Ержанұлы осыған дейін мемлекетке қайтарылған жер учаскелерінің 1,5 мың га қоғамдық жайылым ретінде рәсімделгенін атап өтті.
