Шарада мемлекеттік тілді қолданудағы және оның мәртебесі туралы бірқатар мәселелер талқыға түсті.
«Тіл – ұлттың игілігі, әрі оның ажырамас бөлігі. Қандай да бір халықтың болмысы, өркениеттілігі, саналылығы, сауаттылығы тіл мәдениетімен, сол тілдің қолданыс аясының кеңдігімен өлшенеді. Белгілі бір тілдің мемлекеттік мәртебеге ие болуы оңай міндет емес, себебі ол тіл сол мемлекет иесі болып отырған халықтың мүддесінен шығып, барлық саладағы мұқтаждықты өтей алатын дәрежеде болуы шарт», — деді жиында облыстық тілдерді дамыту жөніндегі басқармасының бөлім басшысы Айбол Нүсіпқожаев.
Мұнымен қоса, аға буын өкілдері жас ұрпақтың қазақ тілін білмей, өзге тілде шүлдірлеуіне алаңдаулы. Айтуларынша, бұл қалыпты үрдіске айналып келе жатқаны ұлттық трагедия. Ал, бұл мәселеге теледидар мен ғаламтор кінәлі дейді мамандар. Сондықтан, интернет ресурстарындағы қазақ тіліндегі контент үлесін дамытуға баса көңіл бөлу керектігін жеткізді.
Семинарды қорытындылай келе, мемлекеттік тіл – бүкіл қазақстандықтардың тілі. Сондықтан да «мемлекеттік тілдің проблемасын – тек қазақ халқының ғана проблемасы» деп қарауға болмайтыны айтылды. Әлемдегі өркениетті елдердегідей мемлекеттік басқару жүйесінде қызмет істейтіндердің бәрі қазақ тілін білуге міндетті екені, онсыз ол мемлекеттік тіл болып есептелмейтіні сөз етілді.
