Марафон басталған алғашқы күндерден-ақ Алматы облысының еріктілері жоғары белсенділік танытып, екі мыңнан астам іс-шара ұйымдастырды. Бұл көрсеткіш бойынша өңір республика бойынша көш бастап келеді.
Алматы облыстық Жастар саясаты мәселелері басқармасының дерегінше, бүгінде өңірде 20-дан астам ірі еріктілер ұйымы жұмыс істейді. Еріктілердің жалпы саны 10 мыңнан асады. Қозғалыс барлық аудан мен ауылдық округті қамтып, әлеуметтік қолдаудан бастап экологиялық жобаларға дейін түрлі бағыттарды біріктіруде. Әсіресе Мемлекет басшысының «Тaza Қазақстан» бастамасы аясында экологиялық волонтерлік қызметке деген қызығушылық артып келеді.
«Соңғы бір жарым жылда жастарды еріктілік қызметіне тарту бойынша жүйелі жұмыс жүргізіліп жатыр. Арнайы іс-шаралар күнтізбесі бекітіліп, Жастар ресурстық орталығы жанынан еріктілік бастамаларды дамыту және қолдау бөлімі ашылды. Сонымен қатар алғашқы көмек көрсету, көшбасшылық, іс-шара ұйымдастыру және жобалық басқару бойынша оқыту курстары іске қосылды», — деді Алматы облыстық Жастар саясаты мәселелері басқармасының басшысы Мәди Ахметов.
Бұдан бөлек, әлеуметтік желілер мен бұқаралық ақпарат құралдарында еріктілікті насихаттау мақсатында кең көлемді ақпараттық науқан жүргізілуде. Негізгі мақсат — жаңа еріктілерді тарту және қоғамда еріктілер еңбегінің маңызын кеңінен насихаттау.
Сонымен қатар Алматы облысының Еріктілер фронт-офисі өз жұмысын жаңартып, жыл бойына жүйелі түрде өткізілетін білім беру бағдарламаларын енгізуде. Бұл бағдарламалар еріктілерге тек көмек көрсетіп қана қоймай, кәсіби дағдыларын дамытуға мүмкіндік береді.
Мамандардың айтуынша, «Жақсылық жаса» марафоны жастардың азаматтық белсенділігін арттырып, қоғамда еріктілік мәдениетін қалыптастыратын маңызды алаңға айналмақ.
