Қытайдың Ханчжоу қаласында 2023 жылдың 23 қыркүйегінде басталған Азия ойындары 8 қазанға дейін жалғасады.
Әлем кубогының бірнеше дүркін жеңімпазы, әлем чемпионатының жеңімпазы Әсем Орынбай мен әлем кубогы мен чемпионатының жеңімпазы Эдуард Ещенко стенд атудан аралас жұптық сайыста алтын алды. Скит жаттығуларының финалында қазақстандықтар Кувейттен келген қарсыластарынан мықты болды. Қазақстан әйелдер құрамасы сапында да Әсем Орынбай жерлестері Ольга Панарина мен Зоя Кравченкомен бірге скит жаттығуларында алтын медаль жеңіп алып, Азия ойындарында рекорд орнатты. Әсем Орынбай сондай-ақ жекелей сынның финалда да қола жүлдегер атанды. Қазіргі таңда Әсем Орынбай құрлықтық додалардағы ең атақты қазақстандық спортшы.
Алматы облысының тағы бір спортшысы Аян Тұрсын ушу-санда жарысында қола жүлдені жеңіп алды. Тұрсын ММА (IMMAF), панкратион және қоян-қолтық ұрыс бойынша вице-чемпион. Азия ойындарында 52 келіге дейінгі салмақта жартылай финалға дейін жетіп, қытайлық Юэйяо Лиге есе жіберіп, қола жүлдені жеңіп алды.
Азия ойындарында Қазақстан Республикасының құрама командасы сапында Алматы облысынан барлығы 10 спортшы қатысуда.
Алда әлі Алматы облысының спортшылары Марина Седнева әйелдер күресінен өнер көрсетсе Мариан Ордабаева джиу-джитсудан бақ сынасады.
Әйелдер күресі мен джиу-джитсудан турнирлер 5 және 7 қазанда өтеді.
Естеріңізге сала кетейік, Азия ойындары – Азия Олимпиада кеңесінің (АОК) басшылығымен төрт жылда бір рет өтетін Азия құрлығының спортшылары арасындағы кешенді спорттық жарыс. Қазақстан Азия ойындарына 1994 жылдан бері сегізінші рет қатысып отыр.
