«7 күн бойы әкімдік қызметкерлері арнайы көлікпен тұрғындарға су тасып жатыр. Оны тек ауыз суға қолданып жүрміз. Ал қарды ерітіп, кір-қоң, ыдыс-аяқ жууға пайдаланамыз. Қыстыгүні су тасып күн көреміз деп ойламаппыз», — дейді ауыл тұрғыны Дана Мейірбекова.
Ауылды сумен қамтамасыз ету мақсатында 38 адамнан құралған бригада жұмыс істеп жатыр. Жағдайды тексеру үшін бүгін мұнда облыстық комиссия өкілдері де келді. Олар мәселе енді өңір басшылығының бақылауында болатынын айтады.
«Бүгін арнайы комиссия құрылып, мәселені бақылауымызға алдық. Құбыр қатқан тау етегіне барып, өз көзімізбен көріп қайттық. Су желісінің жалпы ұзындығы — 9,5 шақырым, оның 1,5 километрі қатқан. Темір құбырдың бойына резеңке дөңгелектерді қойып, оны өртеп, еріту жұмыстары жүріп жатыр. Қазіргі таңда құбырдың суы ерітілмеген 90 метрлік бөлігі қалды», — деді облыстық энергетика және тұрғын үй-коммуналдық шаруашылығы басқармасы басшысының орынбасары Айдар Бағашарұлы.
Басқарма маманының сөзіне сүйенсек, негізгі су құбырының жұмысы жанданғанға дейін жағдайдан уақытша шығу үшін ұзындығы – 90 және 300 метр болатын 40 градус аязға шыдамды құбырлар орнатылған.
Айта кетейік, Жаңатұрмыс ауылындағы ауыз су мәселесін түбегейлі шешу мақсатында осы күні ұңғыма құрылысы жүргізіліп жатыр – 2023 жылы қолданысқа беріледі.
