Әкім сайлауы өткізіліп жатқан сол 45 ауданның, нақтылай кетсек 42 аудан мен 3 қаланың ішінде сайлаушы саны көп аймақ – Жамбыл ауданы. Бұл туралы ақпаратты Жамбыл аудандық сайлау комиссиясының төрағасы Жақсылық Қарымбаев айтты.
Аталған аудан бойынша дауыс беру құқығы бар азаматтардың саны – 105 895. Осынша адамның сайлау құқығын жүзеге асыруы үшін бүгін аудан аумағында 77 сайлау комиссиясы жұмыс істеп жатыр. Ондағы комиссия мүшелерінің саны – 534 адам. Таңғы сағат 7-де басталған дауыс беру науқанында іркіліс жоқ.
Аудандық сайлау комиссиясы төрағасының айтуынша, халықтың белсенділігі жоғары. Мәселен, күндізгі сағат 10.00-ге дейін сайлаушылардың 11,7 пайызы өздері тіркелген сайлау учаскелеріне келіп, таңдауларын жасаған.
Бұл аралықта сайлау учаскелерінде ешқандай тәртіп бұзушылық, заңсыздықтар болған жоқ дейді Жақсылық Сұлтанұлы. Сағат 16.00-де Жамбыл ауданында сайлаушылардың 48 пайызы дауыс беріп үлгерді.
