Компанияның мәліметінше, автожолдардағы санитарлық жағдайды жақсарту және жол бойындағы инфрақұрылымды ретке келтіру үшін бір айлық тазалық акциясы басталған. Акция барысында жол жиегін, демалыс алаңдарын, тұрақ аймақтарын және жол қызметі нысандарын тазалау жұмыстары қарқынды жүргізілуде.
Жол бойындағы тазалықты қамтамасыз ету үшін «ҚАЖсервис» ЖШС-нің шамамен 1,5 мың қызметкері мен 1,2 мыңға жуық арнайы техника күн сайын жұмыс істеп жатыр.
Компания өкілдері бұл жұмыстардың негізгі мақсаты туристер мен жол пайдаланушыларға қолайлы жағдай жасау, жол бойындағы қауіпсіздік пен тазалық деңгейін арттыру екенін атап өтті.
ҚазАвтоЖол барлық жол пайдаланушыларды экологиялық акцияға белсенді қатысуға шақырып отыр.
«Инженерлік инфрақұрылымды жауапкершілікпен пайдаланып, жолдардың тазалығын сақтауға және тәулік бойы жұмыс істеп жатқан қызметкерлердің еңбегін бағалауға шақырамыз», — делінген компания хабарламасында.
Сонымен қатар барлық жол қызметі нысандарында «1403» байланыс орталығының нөмірі мен ҚазАвтоЖол компаниясының диспетчерлік қызметінің WhatsApp чатына бағыттайтын QR-код орналастырылған.
Осы арқылы азаматтар жол бойындағы қызмет көрсету нысандарындағы тазалық жағдайына қатысты хабарлама қалдыра алады.
