Мамандардың айтуынша, тауарын шекарадан шығармақ болған кәсіпкерлер бір құжатты 2-3 рет рәсімдейді. Бұл процесс бизнес өкілдерінің жұмысын қиындатып отыр.
«Қазіргі уақытта Еуропаға қарағанда, тауарларды Еуразиялық экономикалық одақ (ЕАЭО) аумағына шығару әлдеқайда қиындады. Себебі, кәсіпкерлер қосымша құжат (тауарға ілеспе жүкқұжат) рәсімдеумен әбігерге түсіп жүр. Ал жүкқұжат электронды шот-фактураны (ЭШФ) қайталайтын құжат екені рас. Сондықтан кәсіпкерлер ТІЖ және виртуалды қойма (ВҚ) мәселесін қайта қарастыруды ұсынып отыр», — деді кеңес төрағасы Григорий Мерисов.
Сонымен қатар жиынға қатысушылар ЭШФ — тауар айналымын бақылау және қадағалау үшін енгізілгенін, соның әсерінен бизнес өкілдері жасайтын есептер саны азайғанын айтты. Олардың мәліметінше, ЕАЭО-дан келген не ол жаққа шыққан тауарлар ВҚ-ға ТІЖ арқылы рәсімделеді. Бұл процесс — адамдардың уақытын алады және бар шараның мерзімін ұзаққа созып жібереді. Мұның орнына ЭШФ есебін пайдалану тиімдірек.
Кеңес соңында қатысушылар ҚР Бәсекелестікті қорғау және дамыту агенттігіне тауарларға ілеспе жүкқұжаттарды және «Виртуалды қойманы» жою туралы Кедергі картасын жіберу туралы шешім қабылдады.
