Оқиға кешкі уақытта орын алған. Ер адам Талғар өзеніндегі шағын аралға барған. Алайда кенеттен күшейген су ағысы оның өз бетімен жағаға шығуына мүмкіндік бермеген.
Департаменттің хабарлауынша, көмекке полицейлер жедел жеткен. Талғар ауданы полиция басқармасы бастығының орынбасары Берік Нұрғалиев аға лейтенанттар Арман Сарманов және Еркебұлан Сәкеновпен бірге оқиға орнына аттанған.
«Жағдайды бағалап, зардап шегушінің өміріне төнген қатерді ескерген басқарма бастығының орынбасары суға өзі түсіп, қатты ағынға қарамастан ер адамды жағаға алып шықты», – деп хабарлады ведомство.
Полиция қызметкерлерінің жедел әрі батыл әрекеттерінің арқасында азамат дін аман қалды.
Алматы облысы полиция департаменті тұрғындарды су айдындарында сақтық шараларын қатаң сақтауға шақырды.
