Іс-шара әлеуметтік тапсырыс аясында “Іле мұрагер” қоғамдық бірлестігінің ұйымдастыруымен өткізілді.
Бұл кездесудің басты мақсаты – мемлекеттік мекемелер мен мемлекеттік қызметшілерге Қазақстан Республикасының мемлекеттік рәміздерін қолданудың құқықтық және нормативтік тәртібін түсіндіру, сондай-ақ жастар арасында рәміздерге деген құрмет пен патриоттық сезімді қалыптастыру болды.
Кездесуге Талғар ауданы Ішкі саясат бөлімінің бас маманы Әбдібай Өркен және ҚР Сауда және интеграция министрлігі Техникалық реттеу және метрология комитетінің Алматы облысы бойынша департаменті РММ-нің бас маманы, инспектор Отыншиев Дамир Болатұлы қатысты. Олар мемлекеттік рәміздердің – Ту, Елтаңба және Әнұранның – мәні мен маңызына, оларды дұрыс қолдану ережелеріне, рәміздер арқылы ел бірлігі мен ұлттық сана-сезімді арттырудың маңыздылығына тоқталды.
Кездесу барысында қатысушылар белсенділік танытып, өздерін қызықтырған сұрақтарды қойып, пікір алмасуға атсалысты. Бұл өз кезегінде жастардың елдік мәселелерге бейжай қарамайтындығын және азаматтық белсенділігінің жоғары екендігін көрсетті.
Мұндай іс-шаралар – өскелең ұрпақты елжандылыққа тәрбиелеудің, ұлттық құндылықтарды дәріптеудің маңызды тетігі. Мемлекеттік рәміздерге құрмет көрсету – әрбір азаматтың парызы. Сол себепті мұндай кездесулердің мәні де, маңызы да ерекше.
