«Біз Жамбыл ауданына қараймыз. Суармалы жердің көлемі – 3,5 мың гектар. Оның барлығы тамшылап суару әдісіне өткен. Дегенмен, су тапшылығы мәселесі 3 жылдан бері өз шешімін таппай келеді. Әр гектарға кем дегенде 800 мың теңге жұмсап, тамшылап суаратын арнайы құрал-жабдықтарды қойдық. Дәнді дақылдарды еккеннен орғанға дейінгі шығынның бәрі жердің астына көміліп қалайын деп тұр», — деді ауыл шаруашылығының көкейкесті мәселесін көтерген Хамза Бабалықов.
Алматы облысының әкімі Марат Сұлтанғазиев та мәселенің бар екенін теріске шығармады. Оның айтуынша, су тапшылығы тек Жамбыл ауданының ғана емес, Қонаевтың өзінде де түйіткілді проблемаға айналды.
«Бір жағынан Іленің деңгейі түсіп кетті, екінші жағынан таудан келетін су көлемі азайды. Сондықтан суды үнемдеп пайдалану технологиясына көшуіміз керек. Ол үшін Ұйғыр ауданында 4, Алматы қаласына шалғай жатқан облыс аудандарына 2 бөген салынбақ. Ал қазіргі жұмыс істеп тұрған 5 бөген толығымен тазаланады», — деді өңір басшысы.
Аталған жобаны әлеуметтік-кәсіпкерлік корпорация жүзеге асырады. Бұған жергілікті бюджеттен 3,5 млрд теңге қарастырылмақ.
