Алматы облысы әкімдігі Жаңа жыл қарсаңында заңсыз шырша кескендер қанша айыппұл арқалайтынын мәлімдеді, деп хабарлайды alataunews.kz.
Әкімдік мәліметінше, Жаңа жыл мерекесінің қарсаңында елімізде қылқан жапырақты ағаштарды (шырша, қарағай және басқалары) заңсыз кесу жағдайлары жиі кездеседі. Әсіресе шыршалар дүкендерде және базарларда сатылады, бірақ оны заңсыз кесу — экологиялық қауіпті әрекет ғана емес, сондай-ақ құқықбұзушылыққа жатады.
Әкімдік орман қорының ағаштарын заңсыз кесу, жою немесе зақымдау үшін қатаң жазалар қарастырылғанын ескертеді. Егер келтірілген шығын 50 АЕК-ке тең болса, жеке тұлғаларға 369 200 теңге айыппұл салынады. Шағын кәсіпкерлік субъектілері мен коммерциялық емес ұйымдарға 1 107 600 теңге, орта кәсіпкерлік субъектілеріне 1 476 800 теңге, ал ірі кәсіпкерлікпен айналысатын заңды тұлғаларға 3 692 000 теңге көлемінде айыппұл қарастырылған.
Егер келтірілген зиян мөлшері 50 АЕК-тен асса, құқық бұзушылық қылмыстық кодекс нормалары бойынша қаралып, әкімшілік құқық бұзушылық санатына жатқызылмайды.
«Жаңа жылдық шырша мен қарағайларды заңсыз кесу ауыр салдарға әкелетінін ескере отырып, тұрғындар мен кәсіпкерлерді табиғатты қорғауға шақырамыз. Орман байлығы – еліміздің баға жетпес қазынасы, оны сақтау – баршамыздың ортақ міндетіміз», – деп мәлімдеді әкімдік.
