Аймақтағы спорттың дамуына үлес қосып жүрген азаматтарды облыстық дене шынықтыру және спорт басқармасы басшысының міндетін атқарушы Ерболат Сарабеков арнайы құттықтады.
«Алматы облысында спорт саласына тиісті дәрежеде көңіл бөлініп, мемлекет тарапынан қолдау көрсетілуде. Мәселен, спортшыларды әлеуметтік қолдау, спорт инфрақұрылымын, бұқаралық спортты дамыту бойынша біраз істер атқарылды. Алдағы уақытта өздеріңізбен бірлесе отырып, жақсы нәтижелерге қол жеткіземіз деген сенімдемін. Біз жыл сайын дәстүрлі түрде спорт қызметкерлеріне құрмет көрсетіп, кәсіби Спорт күні мерекесін атап өтіп келеміз. Баршаларыңызға баянды бақыт тілеймін», — деді құттықтау сөзінде Ерболат Сарабеков.
Бұл күні спортқа бар ғұмырын арнаған саңлақтардың мерейі үстем болды. Салтанатты шарада ҚР Мәдениет және спорт министрінің «Құрметті спорт қызметкері» төсбелгісі және министрліктің Құрмет грамотасы, Алғыс хат, «Спорт саласының үздігі», «Спорт жанашыры» төсбелгілерімен марапатталды.
Сондай-ақ, жиында Алматы облысының дене мүмкіндіктері шектеулі тұлғаларға арналған спортты дамыту дирекциясына, Қарасай ауданының №2 балалар мен жасөспірімдер спорт мектебіне және Алматы облыстық бұқаралық-спорттық іс-шараларды өткізу орталығының ұжымына автокөліктің кілті табысталды.
Еске саламыз, өткен жылдан бері 8 балалар мен жасөспірімдер спорт мектебі ашылды. Сонымен қатар, Райымбек ауданы Қызылшекара ауылында 60 орынды спорт кешені пайдалануға беріліп, 7 нысан бойынша құрылыс-монтаждау жұмыстары жүргізілуде. 2027 жылға дейін өңірде спорттық 15 ғимарат салу жоспарлануда.
