Қазіргі таңда қаланың түрлі шағынаудандарында 86 жаңа тұрғын үйдің құрылысы жүргізілуде. Жобалар аясында абаттандырылған аулалар, сауда нысандары және демалыс орындары қарастырылған.
Д. Қонаев даңғылында «MDI Construction» ЖШС «Маяк» тұрғын үй кешенін салып жатыр. Жоба жеті төрт қабатты секциядан тұрады және 216 пәтерді қамтиды. Кешен аумағында жеке кафе, дүкен және спорт залы болады.
19-шағынауданда «Хаммер Бау Девелопмент» ЖШС «Атамекен» тұрғын үй кешенін тұрғызуда. Жоба үш тоғыз қабатты кең пәтерлі үйден тұрады. Құрылысты 2025 жылдың соңына дейін аяқтау жоспарланған.
Ірі жобалардың бірі – «Али-Нұр транс» ЖШС-нің «NNS City» тұрғын үй кешені. Мұнда 21 бес қабатты үй салынып, шамамен 600 пәтер пайдалануға беріледі. Бірінші кезектің құрылысы 2026 жылдың қарашасында аяқталмақ.
Д.А. Қонаев даңғылында Retail Construction компаниясы 50 пәтерден тұратын ықшам бес қабатты үй салып жатыр. Нысанды 2025 жылдың желтоқсанында тапсыру жоспарланған.
«R&M Construction» ЖШС жүзеге асырып жатқан «Аристократ» тұрғын үй кешені 25 үйден тұрады. Қазіргі таңда кейбір үйлер пайдалануға берілген, ал жоба толықтай 2027 жылы аяқталады.
«GS QURYLYS» ЖШС «Comfort» тұрғын үй кешенінің құрылысын жүргізуде. Жоба төрт тұрғын блоктан, дүкендер мен автотұрақтан тұрады. Құрылысты 2026 жылдың басында аяқтау көзделген.
10-шағынауданда Chinese Foreign Construction Company компаниясы «Феникс» тұрғын үй кешенінің құрылысын бастайды. Бірінші кезек 2026 жылы пайдалануға берілмек.
Осы жылдың басынан бері қалада 14,213 мың шаршы метр тұрғын үй пайдалануға берілді, бұл 2024 жылғы көрсеткіштің 65,2%-ын құрайды. Құрылыс жұмыстарының жалпы көлемі 8 млрд теңгеге жетті.
Жоспарланған жобалар іске асқанда, қала тұрғындары заманауи әрі жайлы пәтерлермен қамтамасыз етіліп қана қоймай, әлеуметтік және коммерциялық инфрақұрылым да едәуір дамиды.
