2022 жылы дәл осы күні бұрынғы Қапшағай қаласы ресми түрде облыс орталығы болып жарияланған еді.
Осы уақыт ішінде қалада және облыс аумағында ауқымды әлеуметтік-экономикалық өзгерістер жүзеге асты. Үш жыл ішінде жалпы өңірлік өнім 109,6%-ға өсіп, 5,9 трлн теңгеге жетті. Шикізаттық емес сектордағы өсім қарқыны бойынша Алматы облысы республикадағы алдыңғы бестікке енді.
Өңірге 2,3 трлн теңгеден астам инвестиция тартылды. Халықаралық деңгейдегі PepsiCo, LC Waikiki, KT&G, Qazaq Global Food сынды компаниялар өз өндіріс алаңдарын ашты. Бұған қоса, Қытаймен жалпы құны 7 млрд АҚШ долларына жуық келісімдер жасалып, нәтижесінде шамамен 6 мың жаңа жұмыс орны құрылды.
Инфрақұрылым саласында да ауқымды жобалар жүзеге асырылды. 1000 шақырымнан астам автожол жөнделіп немесе жаңадан салынды. Газбен қамту деңгейі 58,1%-ға жетті, ал ауылдық елді мекендердің 99,5%-ы орталықтандырылған ауызсумен қамтамасыз етілді. Үш жыл ішінде шамамен 2 млн шаршы метр тұрғын үй пайдалануға берілді.
Адам капиталы мен цифрландыру саласында да айтарлықтай нәтижелер бар. 140 мыңнан астам жаңа жұмыс орны ашылып, жұмыссыздық деңгейі 4,6%-ға дейін төмендеді. «Цифрлық отбасы картасы» және заманауи білім беру платформалары енгізілді.
Қонаев қаласы Smart Qonaev жобасы аясында дамып келеді. Қаржыландыру көлемі төрт есеге артты. Қалада қоғамдық кеңістіктер жаңартылып, туристік инфрақұрылым жетілдірілуде. 2025 жылы қалаға 1,6 млн турист келеді деп күтілуде.
Сонымен қатар, Қонаев қаласының маңында еркін экономикалық аймақ мәртебесіне ие жаңа Алатау қаласының құрылысы басталды. 2025 жылы бұл жобаның инфрақұрылымына 100,7 млрд теңге бағытталмақ.
Бүгінгі таңда Алматы облысы – тұрақты дамып келе жатқан өңір. Мұнда өмір сүруге, жұмыс істеуге және кәсіби тұрғыда өсуге барынша қолайлы жағдайлар жасалуда. Ал Қонаев қаласы облыстың әлеуметтік-экономикалық өрлеуінің жаңа орталығына айналып отыр.
