Халықаралық деңгейдегі шара American University of Technology in Tashkent базасында ұйымдастырылады.
STEM for Youth форумы IT, инженерия, робототехника және ғылым саласына қызығушылық танытатын мектеп оқушылары мен студенттерге арналған алаң ретінде ұсынылып отыр. Форум аясында қатысушылар практикалық білім алып, STEM саласындағы мансаптық мүмкіндіктермен танысып, өзара тәжірибе алмасуға мүмкіндік алады.
Форумның ұйымдастырушысы — NERV қазақстандық командасы. Олар халықаралық FIRST Tech Challenge робототехника жарысына қатысып, STEM білімін дамытуға бағытталған жобаларды жүзеге асырып келеді. Команда IT, робототехника, инженерия және технология саласындағы жас мамандарды біріктіріп, жастар арасында техникалық білімнің кеңінен таралуына үлес қосып жүр.
Іс-шара барысында спикерлер STEM бағытындағы кәсіби тәжірибелерімен бөлісіп, жеке даму жолдары туралы әңгімелейді. Форум жас буынның инновациялық ойлау қабілетін дамытуға және Орталық Азия елдері жастары арасындағы ынтымақтастықты нығайтуға бағытталған.
Форумға Алматы қаласынан әртүрлі білім беру ұйымдарынан келген оқушылар қатысады. Атап айтқанда:
• Ізім Айзия — Алматы қаласы, №79 КГУ
• Абдикадиров Амангелді — Республикалық физика-математика мектебі
• Турлыбек Альнұр — Республикалық физика-математика мектебі
• Кемелбаева Алина — №103 гимназия
Айта кетейік, STEM for Youth форумы — қазақстандық оқушылардың шетелде бастамашы болып, халықаралық деңгейде білім мен технология саласында тәжірибе алмасуына жол ашатын маңызды алаңдардың бірі.
