Презентация барысында Ресейдің «Росатом» мемлекеттік корпорациясы салған Нововоронеж АЭС-інің №6 энергоблогының үлгісі көрсетілді. Бұл энергоблок — әлемдегі алғашқы 3+ буындағы ядролық реакторлардың бірі саналады.
Көрсетілген макет Қазақстандағы болашақ АЭС-тің нақты жобасы емес, тек «Росатомның» бұрынғы жобаларының бірі ретінде ұсынылған.
«Қазіргі таңда нақты дизайн дайын емес. Презентацияда ұсынылған макет – «Росатомның» өзге елдерде жүзеге асырған жобаларының бірі. Қазақстанда салынатын АЭС осындай сипатта болуы мүмкін», — деп түсіндірді жоба өкілдері.
АЭС құрылысы басталса, жобаның құны кемінде 14 миллиард доллар деп бағаланып отыр.
Жоба таныстырылымы қоғамда түрлі пікір туғызды. Қоғам белсенділері мен саясаттанушылар АЭС-ті Ресей компаниясы салатын болса, бұл Қазақстанды технологиялық және энергетикалық тұрғыда Мәскеуге тәуелді етуі мүмкін деп алаңдайды.
Сондай-ақ экологтар Балқаш көліне төнетін экологиялық қауіпке назар аударуда. Өйткені жобаның алдын ала ұсынылған нұсқаларына сәйкес, АЭС Балқашқа жақын орналасуы мүмкін.
Ал үкімет өкілдері мұндай алаңдаушылықтарды жоққа шығарып отыр. Олардың айтуынша, барлық шешімдер ашық конкурс, халықаралық сараптама мен қоғам пікірін ескере отырып қабылданады.
