Енді бұл арнаны еліміздің барлық өңіріндегі көрермендер Alma TV және Otau TV платформалары арқылы тамашалай алады. Арна күн сайын таңғы сағат 08:00-ден түнгі 00:00-ге дейін хабар таратады.
Жаңа арна өзін Алматы облысы мен жалпы Қазақстандағы өмірге бағытталған заманауи медиаресурс ретінде ұсынады. Эфирде жаңалықтар, сараптамалық бағдарламалар, ток-шоулар, сұхбаттар, деректі және ойын-сауық жобалары көрсетілмек. Сонымен қатар әлеуметтік бастамаларға, білім беру мен медицина саласын дамытуға, бизнеске, мәдениетке, спорт және экология тақырыптарына ерекше назар аударылмақ.
Телеарна басшысы Қымбат Хангелдинаның айтуынша, Qonaev Media-ның ашылуы отандық телеарна кеңістігіне жаңа серпін береді.
— Біздің басты мақсатымыз – халыққа жақын болып, өңір мен елдің болмысын айқындайтын шынайы оқиғаларды көрсету. Көрермен эфирден тек ақпарат қана емес, шабыт алып, айналасында болып жатқан оқиғаларға өзінің қатысы бар екенін сезінуін қалаймыз, – деді ол.
Qonaev Media ұжымы көрерменге арналған контентті заманауи форматта ұсынуды көздейді. Олар бағдарламаларды ақпараттылық, серпінділік және жеңіл қабылданатын мазмұнмен үйлестіру арқылы кең аудиторияны қамтуды жоспарлап отыр.
Жаңа телеарнаның эфирге шығуы – еліміздегі медиа кеңістіктің дамуына тың серпін беріп, аймақтық және ұлттық деңгейдегі маңызды тақырыптарды кеңінен насихаттауға жол ашады.
