Мамандардың айтуынша, сыбайлас жемқорлық қоғамның мемлекеттік институттарға деген сеніміне нұқсан келтіріп қана қоймай, экономиканың тиімділігі мен әлеуметтік әділеттілікке де кері әсер етеді. Осыған байланысты елде бұл құбылыстың алдын алу мен жолын кесуге бағытталған жүйелі жұмыстар жүргізіліп жатыр.
Бұл ретте «Сыбайлас жемқорлыққа қарсы іс-қимыл туралы» заң негізгі құқықтық құжаттардың бірі саналады. Құжатта заңдылық, ашықтық, есептілік және азаматтардың құқықтарын қорғау қағидаттары қамтылған.
Сондай-ақ елімізде Сыбайлас жемқорлыққа қарсы қызмет жұмыс істейді. Бұдан бөлек, квазимемлекеттік секторда комплаенс-қызметтер енгізіліп, құқықбұзушылықтардың алдын алуға басымдық берілуде.
Сарапшылардың пікірінше, сыбайлас жемқорлық тәуекелдерін азайтудың тиімді жолдарының бірі – мемлекеттік қызметтерді цифрландыру. Электронды үкімет, онлайн сервистер мен автоматтандырылған жүйелер адами факторды азайтып, ашықтықты арттыруға мүмкіндік беріп отыр.
Сонымен бірге қоғамда сыбайлас жемқорлыққа қарсы мәдениетті қалыптастыруға ерекше мән берілуде. Бұл бағытта түсіндіру жұмыстары жүргізіліп, мемлекеттік қызметшілер тұрақты түрде этика және антикоррупциялық талаптар бойынша оқытылады.
Ашықтық пен қоғамдық бақылауды күшейту де маңызды бағыттардың бірі. Азаматтар мен үкіметтік емес ұйымдардың мемлекеттік органдар жұмысына мониторинг жүргізуге қатысуы сенімді арттыруға ықпал етеді.
Алматы облысының Санитариялық-эпидемиологиялық бақылау департаментінде де бұл бағыттағы профилактикалық жұмыстар тұрақты жүргізіліп келеді. Мәселен, 2026 жылдың бірінші тоқсанында Әдеп жөніндегі уәкіл мемлекеттік қызмет және сыбайлас жемқорлыққа қарсы заңнама талаптарын сақтау мәселелері бойынша консультациялық көмек көрсетіп, төрт семинар ұйымдастырған. Оның үшеуі көшпелі форматта өткен. Сонымен қатар интернет-ресурстарда үш мақала жарияланған.
Мамандардың айтуынша, сыбайлас жемқорлықпен күрес бір реттік науқан емес, үздіксіз жетілдіруді қажет ететін үдеріс. Сондықтан бұл бағыттағы жұмыстар алдағы уақытта да жалғаса береді.
