Енді басқарушы ұйымдар кондоминиум объектілерін ескертусіз тастап кете алмайды және ай сайынғы тарифті өз бетінше көтеру құқығынан айырылады.
Жаңа заңнамаға сәйкес, басқарушы компания немесе ПИК кондоминиум объектісін басқару қызметінің құнын өзгертуге немесе өз жұмысын мерзімінен бұрын тоқтатуға ниет білдірсе, ол туралы барлық меншік иелерін – пәтер, тұрғын емес үй-жайлар, автотұрақ пен қойма иелерін – кемінде үш ай бұрын хабардар етуге міндетті.
Тарифті көтеру мәселесін тек меншік иелерінің жиналысында қарастыруға болады. Бұл шешім хаттамамен рәсімделіп, онда тұрғындардың тариф өсіміне келісімі не бас тартуы, сондай-ақ басқарушы ұйымды ауыстыруға қатысты шешімі көрсетіледі.
Сонымен қатар басқарушы субъектілер тұрғын үй инспекциясын өз қызметін бастау немесе тоқтату туралы, объектінің нақты мекенжайын көрсете отырып, кемінде үш күн бұрын хабардар етуге тиіс.
Өз кезегінде тұрғын үй инспекциялары бұл ақпараттың барлығын бірыңғай тізілімге енгізіп отырады.
Жаңа ереже тұрғындардың құқықтарын қорғауды күшейтіп, тұрғын үйлерді басқару жүйесінің ашықтығын арттыруға бағытталған.
