Балаларға шұғыл медициналық жәрдем орталығының баспасөз қызметінің мәліметінше, уақытылы көрсетілген хирургиялық көмектен кейін дәрігерлер олардың өмірін сақтап қалды. Бұл оқиғалар ата-аналардың балаларға ойыншық алып берерде мұқият болуы қажет екенін тағы да дәлелдейді.
Бірінші жағдайда 2 жастағы баланың ішегінде 13 магниттің тұрып қалғаны анықталды.
4 қаңтарға қараған түні екі жасар бала ішінің қатты ауырсынуына шағымданып, Балаларға жедел медициналық көмек көрсету орталығының қабылдау бөліміне түсті. Ата-аналар баланың жағдайының нашарлағанын байқап, оны шұғыл түрде ауруханаға жеткізді.
«Науқастың ауруханаға түскен кездегі жағдайы ауыр деп бағаланды. Біз жедел төмен ішек өтімсіздігін, перитонит және инфекциялық-уытты шокты анықтадық. Оған жұтылған магниттік конструктор себеп болды. Баланың ішегінен 13 ұсақ магнит анықталды», — деді қабылдау бөлімінің жауапты хирургі Азат Мамырасыл.
Медициналық көмекті кешіктіру қайтымсыз салдарға әкелуі мүмкін екенін түсінген дәрігерлер шұғыл хирургиялық операция жасады.
«Біз ортаңғы лапаротомия жасап барлық 13 магнитті аш ішектен шығардық. Операциядан кейін бала реаниматологтардың бақылауымен қарқынды терапия бөлімінде біраз уақыт болды. Содан кейін ол бейіндік бөлімге ауыстырылды, ал бір аптадан кейін үйіне шығарылды», — деді хирург.
Екінші жағдайда, 7 жастағы бала ішкі ағзасындағы магнит ойыншықтармен 9 күн бойы жүрген.
Тура бір айдан кейін, 4 ақпанда БШМЖО-ға магнит жұтқан тағы бір бала түсті. Алайда 7 жастағы баланың ата-анасы медициналық көмекке бірден жүгінбеген.
«Ауру тарихына сәйкес, бала 27 қаңтардан бастап ауырған. Ата-анасы баласының жағдайы нашарлағаннан кейін жеке клиникаға апарған. Ол жерде рентгенге түсіріліп, ішегінде бөгде заттың барын анықтаған. Дәрігерлер ауруханаға жүгіну қажет екенін ескерткен, бірақ ата-анасы баланың жағдайын өз бақылауларына алған», — деді Азат Мамырасыл.
Алайда, күн өткен сайын баланың халі нашарлай түседі. 4 ақпанда баланың іші қатты ауырып, әлсіздік пайда болып күніне 15 ретке дейін құсқан. Тек осы кезде ғана оның жақындары жедел жәрдем бригадасын шақырып, шұғыл түрде балаларға жедел медициналық жәрдем көрсету орталығына алып келген.
«Диагноз — жедел төмен ішек өтімсіздігі және асқазан-ішек жолындағы бөгде зат. Бізге екі күрделі операция жасау керек болды. Бірі медианалық лапаротомия, ішек өтімсіздігін жою, 13 магнитті алып тастау, жұқа анастомозды қолдану, санация, трансанальды интубация және іш қуысын дренаждау», — деп түсіндірді хирург.
Қуанышқа орай, ауруханаға жатқызу ұзақ уақытқа созылғанына қарамастан, дәрігерлер баланы құтқара алды. Қазір ол толық сауығып, ауруханадан шығарылды.
Дәрігер Азат Мамырасылұлы білікті медициналық көмекке жүгінуді кешіктірмеуге кеңес береді. Бөгде денелерді жұту, ең алдымен, ішектің перфорациясына немесе перитонитке қауіп төндіреді. Кешенді зерттеу нәтижелері бойынша дәл диагноз қоюға және уақтылы көмек көрсетуге болады. Сонымен қатар іш қуысының рентгенографиясы, КТ немесе МРТ жасалады. Өкінішке қарай, әлемдік тәжірибе көрсеткендей, ата-аналардың немқұрайлылығына байланысты дәрігерлер уақытылы көмек көрсете алмай жатады.
