2024 жылдың 24 қазанында Еңбекшіқазақ ауданының тұрғыны Қаржаубай Нұрымов өрт салдарынан жойылған үйінің орнына барып, учаскені көріп қайтты. Ол өрт себебін анықтайтын сараптама нәтижелерін күтпестен және әкімдік ұсынған көмектен бас тарта отырып, учаскені өз күшімен тазартуды бастады, деп хабарлайды alataunews.kz.
Қайтыс болғандардың туыстарына көрсетілетін көмек туралы ақпаратты Алматы облысы Еңбекшіқазақ ауданы әкімдігінен нақтыладық. Аудан әкімінің баспасөз хатшысы бұл жағдайға байланысты келесідей пікір білдірді: «Аудан әкімдігі тарапынан зардап шеккен отбасыға учаскені тазалау және жаңа үй салу бойынша көмек бірнеше рет ұсынылды. Дегенмен, Қаржаубай Нұрымов құрылыс жұмыстарын 2025 жылдың көктемінде бастайтынын хабарлады. Әкімдік ұсынған уақытша баспана да қабылданбады. Сонымен қатар, қайтыс болғандардың туыстары мен жақындарына шын жүректен көңіл айтамыз», – деді ол.
Аудан билігі құрылыс жұмыстарына қажетті техниканы ұсынуды, сондай-ақ басқа да тиісті қолдау шараларын көрсетуге дайын екенін мәлімдеді. Отбасыға жан-жақты көмек көрсету жұмыстары жалғасады.
