1962 жылы туған азамат Алматы көпсалалы клиникалық ауруханаға сол жақ құлағынан ұзақ жылдар бойы тоқтамай ірің ағуы және есту қабілетінің төмендеуі шағымымен жүгінген. Тексеру нәтижесінде науқаста II дәрежелі аралас есту қабілетінің нашарлауы және дабыл жарғағында перфорация (тесік) бар екені анықталды.
Аурухана оториноларингология бөлімінің мамандары дабыл қуысын толық тексеріп, тимпанопластика жасау туралы шешім қабылдады. Бұл — дабыл жарғағының тұтастығын қалпына келтіріп, естуді жақсартуға арналған жоғары дәлдікті ота түрі. Операция міндетті әлеуметтік медициналық сақтандыру (МӘМС) жүйесі аясында тегін жасалды.
Оториноларингология бөлімінің меңгерушісі Асель Иманғалиева операция нәтижесінің тиімділігін атап өтті:
«Отаға дейінгі аудиограммада сол жақ құлақтағы естудің айтарлықтай төмендегені байқалды. Тимпанопластикадан кейін дабыл жарғағы қалпына келтірілді, ал есту көрсеткіштері дерлік қалыпқа келді. Науқас операциядан кейінгі алғашқы апталарда-ақ естудің айтарлықтай жақсарғанын сезінгенін айтты».
Медициналық деректер де оң өзгерісті растайды: сол жақ есту деңгейі 52 дБ-ден 22 дБ-ге дейін жақсарған. Бұл — отаның тиімді өткенінің айқын дәлелі.
Алматы көпсалалы клиникалық ауруханасында қолданылатын заманауи хирургиялық әдістер созылмалы құлақ ауруларынан зардап шегетін пациенттерге есту қабілетін ғана емес, өмір сапасын да қалпына келтіруге мүмкіндік беріп келеді.
