TikTok желісінде “Мистер Өмірбек” атымен танылған жас мұғалім оқушыларын ағылшын тіліне креативті әдіспен – рэп арқылы үйретіп жүр. Оның ерекше тәсілімен түсірілген бейнероликтері әлеуметтік желіде 1 миллионнан астам қаралым жинап, республикалық деңгейде өзге педагогтарға үлгі болып отыр.
Жас ұстаздың шығармашылығына қоғам да қызығушылық танытуда. Мәжіліс депутаты Даулет Мұқаев мұғалімнің видеосын өз парақшасында бөлісіп, қолдау білдірді. Ал БАҚ өкілдері Өмірбек мырзаны сұхбаттарға жиі шақыра бастады.
Айта кетейік, кейіпкердің толық аты-жөні – Жанкұатов Өмірбек Ерғалиевич. Ол мамандығы бойынша ағылшын және түрік тілі пәнінің мұғалімі. Қазіргі таңда Алматы облысы, Іле ауданы, Қосөзен ауылында еңбек етеді.
Өз әдісі жайлы мұғалімнің өзі былай дейді:
“Менің басты мақсатым – оқушылардың қызығушылығын арттыру. Сабақты тек оқулықпен шектемей, заманауи тәсілдер арқылы ойын элементтерін қосып өткізу балаларды ынталандырады. Ал әуен мен ырғақ оқушылардың есте сақтауын жеңілдетеді. Бұл – әрі ойын, әрі білім беру тәсілі”.
